7 replies to this topic

[yojina]

كل سنه وانتم طيبين جميعا

ومبروووووووك النجاح

وربنا يوفقكوا في كل اللي جاي ان شاء الله

دلوقتي احنا بقينا في سنه تانيه

وكبرنا خلاص

ادخلوا برجلكوا اليمين بقي



مش هقولكوا انسوا اولي خالص لان تقريبا هي هي المواد

بس هقولكوا انسوا توهان اولي واي صعوبه قابلتوها في الاول

ان شاء الله تانيه جميله جدا وسهله جدا

اهم حاجه تحسنوا ظنكوا بالله وتبدأوا السنه بتفاؤل وتتوكلوا علي الله في كل الامور

إِنَّا لَا نُضِيعُ أَجْرَ مَنْ أَحْسَنَ عَمَلًا

،،،،،،،،

هنتكلم هنا ان شاء الله عن كل مايخص سنه تانيه من نظام الكليه واول يوم في السنه و حتي ظهور النتيجه

وهنفتح باب الاستفسارات ان شاء الله عشان تسالوا عن اي حاجه في دماغكوا


فتابعونا

[yojina]

طيب هنتكلم عن نظام الكليه في سنه تانيه



تقريبا النظام هو هو والدكاتره بنسبه كبيره هما هما

نفس الاربع مواد اللجميله بتاعتنا

ANATOMY

PHYSIOLOGY

HISTOLOGY

BIOCHEMISTRY

وكنا بناخد في اولي ماده كده بخمسن درجه الانجليزي تقريبا صح كده بس مش كانت بتضاف للمجموع

ابشروا بقي السنه دي فيه خمسين درجه بردو بس بيضافوا بقي للمجموع

ماده كده غريبه عجيبه هتحبوها اوي اسمها

PSYCHOLOGY

طيب ايه الجديد غير الماده دي في سنه تانيه ؟؟

الجديد بس ان الكم تقريبا نضاعف والصفح كترت بطريقه غريبه



انا طبعا مش بخوفكوا ولكن من اول السنه يبقي فيه حذر من تراكم الدنيا فوق بعضها



يمكن حتي الحذر ده مش هينفع لاتها هتتراكم هتتراكم

وهييجي عليكوا فترات تحسوا ان الدنيا وقفت والنفس خلاص اتقطع والدكاتره بيجروا واحنا بنجري وراهم

ومش عارفين نحصلهم كمان

ونبدا نرفع الرايات البيضا ونستسلم



وحالتنا النفسيه تبقي وحشه بقي



ونضيع السنه في الاحباط
,,,,,,,,


لالالالالالا اطلاقا




كله هيتلم تاني في الاخر ان شاء الله



وهتلاقوا علي الامتحانات كله بيتظبط والمنهج بيكش كده لما رؤساء الاقسام ينزلوا

وهتعدوا فتره كويسه في البيت تلموا كل حاجه ان شاء الله

فمفيش اي داعي لاي احباط

اهم حاجه يكون نفسك طويل وعندك صبر وبتذاكر طووووووووول السنه ومش بتضيع وقت لان السنه طويله ومش مستحمله اي هزار ولا احباط

ولا لعب كمان



افرحكوا شويه  بقي



الكميه اه كبيره جدا بالنسبه لسنه اولي ولكن المضمون اسهل من اولي بكتير جدا ويمكن لا يقارن باولي كمان في بعض المواد


يعني الاناتومي والهستو السنه دي اسهل بكتير من اولي ان شاء الله وسهل جدا يتقفلوا كمان  



يمكن الفسيولوجي والبيو مبيتغيروش كتير



بس كله في الاخر بيعدي علي خير يعني

ربنا يوفقكوا جميعا

هنتكلم بقي انا واهل الخبره من زملائي الاعزاء عن كل ماده ودرجاتها ومذاكرتها ماشيه ازاي

فتابعونا ومتزهقوش

[yojina]

اولا كله يودع سنه اولي وينساها بحلوها ومرها







هنتكلم دلوقتي ان شاء الله عن احلي ماده في وجهه نظري

واكيد انتوا بتحبوها من سنه اولي ان شاء الله


الاناتومي >> علم التشريح




بدايه هناخد ايه السنه دي في الاناتومي ياتري ؟؟


النظري :

عندنا بعون الله في الكتب الاتي :

1- Head & Neck ( 2parts)
part1>> head
part2>> neck

2- Neuroanatomy .

3- Abdomen .

4- pelvis .

5- Emberyology .(special) .



العملي :


هنستكمل بقيه السكيليتون وهناخد ال

SKULL >  الجمجمه + VERTEBRAE .
PELVIS > SACRUM + ILIAC BONES

واهم شئ علي الاطلاق هو الجمجمه







بالنسبه للمحاضرات



زي نظام سنه اولي بالظبط

وتقريبا نفس الدكاتره وزياده حاجات بسيطه

زي مثلا د معتصم بينزل في الابدومن

نصيحه شخصيه ياريت تحضروه محاضراته لانه بيقول كلينيكال كتير اووي ومفيد جدا

والواحد بيحس انه بيتعلم حاجه منه

كمان المحاضرات فايدتها تعرف اسلوب الدكاتره عشان الشفوووووي

وميزه الاناتومي ان الدكتور بينزل في كتاب علي بعضه يعني مفيش تشتت ولا حاجه زي بقيه المواد ان شاء الله
فيه كمان دكتوره امينه بتنزل في الابدومن كويسه جدا وطريقتها قريبه من طريقه د مدحت ..

وطبعا د شريف في الايمبريولوجي كويس جدااااااااا
وناس كتير كانت بتتابع معاه هو ود ايهاب عبد العزيز

وطبعا دكتور مدحت ربنا يكرمه ان شاء الله ينزل محاضرات وطبعا انتوا عارفينه اكتر مني

...


مواعيد المحاضرات

من 8 : 11

وبعدها ساعه فسحه






بالنسبه للسكاشن :

مرتين في الاسبوع

وياريت تحافظوا علي سكشن الاناتومي من اول السنه عشان تضمنوا امتحانات العملي باذن الله

وكل محاضره او حاجه تذاكرها طبق عليها علي الراجل في المشرحه علي طوووووول



وياحبذا لو تتفرجوا علي فيديوهات كتير بتساعد جدا


مواعيد السكاشن


من 12 :3

او من 3:6

بس غالبا بتبقي ل 4ونص بس



بالنسبه لتوزيعه الدرجات





الاناتومي عليه 250 درجه

تيرم اول ....35
عملي ....50 ( 45 امتحان العلي + 5 درجات علي كراسه العملي )
عملي طول السنه ....10
نظري اخر السنه ...125
شفوي ....30
ــــــــــــــــ
250

وسهل جدا ان شاء الله الواحد يجيب فيه اعلي الدرجات

معلومه

اللي بيدخل سنة تانية وهو محول من كلية تانية بيمتحن أناتومي أولى في الدور التاني




الدروس

نصيحه : الدروس مش مهمه خالص لو هتجتهد وتذاكر بضمير وحضور المحاضرات ممكن يكفي لكن احنا بنعرض الراي والري الاخر ولك حريه الاختيار  

بس نصيحه مني متاخدش دروس ووفر وقتك وذاكر كتير وانت مش هتحتاج اي دروس

1- دكتور مدحت

2- دكتور شريف

اما بقي اللي مش عارف يتابع المحاضرات وبيتلغبط من كتره الدكاتره فالدروس هتبقي وسيله كويسه لان هو دكتور واحد وطريقه واحده  
بس  اللي هيتابع في الدروس ميضيعش وقت في المحاضرات

الا اذا هو شايف انه بيستفيد والوقت كده كده ضايع يعني

وبردو الاختيار الاول والاخير ليك ولقدراااااتك

بالنسبه بقي لاي حاجه تخص الاناتومي علي السايت هتلاقوهام هنا ان شاء الله

http://www.medadteam...showtopic=17995
http://www.medadteam...hp?showforum=91




نصايح غالــــــيه واسال مجرب من الاناتومي اللي فات


    

- 1- الاناتومي ماده سهله جدا وبسيطه ومتقنعش نفسك ان كلها حفظ لانها مش كده حاول تستمتع بيها لانها فعلا ممتعه وخصوصا لما تشوف كل حاجه ادامك في المشرحه علم يعني بحق وحقيقي مش اوهام زي بقيه المواد ..

2- مذاكره الاناتومي من اول السنه هتوفر عليك كتيير وهتساعدك في لمها اخر السنه ..ومش صعب علي فكره اللي تاخده تذاكره في ساعتها احنا اللي بنتساهل ونقول خليها بعدين ...


3- عاده وربنا يجعل حظكوا جميل ان شاء الله رؤساء اقسام الاناتومي بيظبطوا الدنيا اخر السنه وبيريحوكوا جداااااا وبيشيلوا حاجات كتير


4-ممكن من اول السنه تعمل كشكول كبييير كده للماده دي وطول مانت ماشي تكتب فيها اسئله السوبر نهيمن عشقــــــــا هتساعدك جداااااااا خلال السنه وياريت لو ترسم بايدك كمان وقبل كل امتحان  هتبقي مرجعك الاول اللي باب الامتحان ....


5- دكاتره المشرحه كويسين جدا وحاولوا تستفيدوا منهم علي اد ماتقدروا ..وبلاش نضيع سكشن الاناتومي  وخصوصا النيورو لان العينات قليله وهيحصل عليه مدابح يعني ...


6-الايمبريولوجي مش عقده ولا حاجه اهم شئ انك تذاكره في ساعتها وهو عاده بتاخده اخر التيرم الاول والتيرم التاني كله ...لو متذاكرش في وقتها واتعاد عليه كتير هيتنسي ..وقد اعذر من انذر !!


7-اهم شئ اختم بيه المراجعــــــــه يعني مينفعش تاخد حاجه في شهر 9 وتذاكرها مره وتيجي تقابلها تاني مره قبل امتحان التيرم ؟؟

حاول كل اسبوع يبقي فيه مراجعه لكل ماده وياريت يكون الكشكول معاك اللي لميت فيه اهم الاسئله ...


8- حاجه مهمه جداااااااااا ..كان دكتور مدحت دايما ينبه علينا نتفرج علي صووووووووور كتير ..طيب الصور دي ليها مصدر من تلاته ..ياما فلاشه لدكتور مدحت يحطلك عليها كل الصور اللي عنده ..ياما كتب دكتور فوزي جاب الله بتاع كل فرع حلوووووووووو اوووووووي جداااا يعني ومش غالي الواحد ب 18 جنيه   ..يااما تتفرج علي اطالس في المكتبه في وقت الفراغ الكبيييير بتاع الكليه ..وياريت لو تجمع التلات حاجات دول مع بعض مش تختار منهم كمان ..اصل الاناتومي ايه غير شويه صور فوق بعض يعني





9- ربنا يوفقكم جميــــــــــعا ان شاء الله

[Lamar]

السلام عليكم

يارب تكونوا معانا ومحدش يزهق خاااالص

دلوقتي معادنا مع  ....... مادة الفسيولوجى


الفسيولوجى

فروع المادة

• sensory
  
• special sense
  
• Motor
  
• Kidney
  
• Endocrine
  
• Reproduction

هو  ان شاء الله هتخدوا العملى فى بعض المواضيع و هتتشرح فى السكاشن




الدرجات

Total   250
الترم الأول  40
العملى   45
امتحان النظرى اخر السنة  125
الشفوى   30
و فى كمان امتحانين اند كورس   10
و دول يا جماعة مواعيدهم غالبا بتبقى فى أول شهر 11 و شهر 3






طب أذاكرها ازاى ؟؟

بص يا سيدى أولا

الكتب

هو انت بتشترى كتاب رئيس القسم اللى بيقولوك عليه و هو ده اللى انت بتعتمد عليه

بالنسبة بأة لو موضوع المحاضرات أو الدروس:

المحاضرات ليها مميزاتها و عيوبها:

المميزات :هى بتنظم الوقت و و بيبقى كويس انك تحضر المحاضرات و تعرف طريقة كل دكتور علشان الشفوى :

العيوب : ساعات الواحد لما يحضر المحاضرات و بعدين السكاشن يروح يحس ان اليوم راح و مافيش وقت يذاكر

الدروس :

طبعا هى بتساعدك انك ماتضيعش و قت و و بيبقى دكتور واخحد بتبقى اتعودت على طريقة شرحه  
بس هى المشكلة ان المحاضرات ساعات بيتقال فيها حاجات بتكون مهمة فى الشفوى

التسجيلات:

فى تسجيلات د ناجى و البرت و دى بتبقى حلوة للى بيعرف يعتمد على التسجيلات



نصيحة :
طبعا يا جماعة كل واحد عارف نظامه و عارف ايه اللى يخليه يذاكر كويس يعمل اللى هو شايفه و مايقلدش حد



الامتحانات

امتحان الترم وده بيبقى ام سى كيو بس

امتحان العملى

وده هيبقى ان شاء الله جزء ام سى كيو على المواضيع العملى   15 درجة

و شيت 30 درجة

و الكلام ده ان شاء الله هيبقى على سنتكوا انتوا بس احنا كنا بنمتحن ام سى كيو بس


امتحان اخر السنة

وده أسئلة نظرى  50 درجة   و ام سى كيو   75 درجة

امتحان الشفوى

  


  

[Adel Halim]

السلام عليكم ورحمة الله وبركاته
دفعة سنة تانية الكرام
استمرارا لسلسلة مداد تيم
"اعرف كل حاجة عن موادك اللى هتدرسها"
البايو





الدرجات

المجموع الكلى 150 درجة

الترم الاول 20
العملى 15
البحث 5
امحتانين اندو كورس 5
الاسبرنج 10
الشفوى 20
الترم التانى 75

الكتب

_ كتاب القسم
المميزات يهتم بالناحية الاكلينيكية بشكل كبير
العيوب مختصر

_كتاب أ. د.عماد زكى
المميزات : أفضل كتب البايو ع الاطلاق ف الشرح
العيوب ناقص بعض المعلومات عن كتاب القسم ف الكلينيكل

_كتاب أ.د.رشيد
المميزات اذا كنت هتسمع محاضراته يبقى مفيد بالنسبة لك لأنك هتشوف كل الكلام قدامك ف الكتاب غير كده بلاش تشتريه
العيوب مستفيض



المحاضرات والسكاشن

بالنسبة للمحاضرات

_المحاضرات العادية
4 محاضرات كل محاضرة ساعة واحدة
*من أفضل الدكاترة اللى بينزلوا المحاضرات
أ.د/ سامية أ.د/ نرمين أ.د/ سمر أ.د/ ايمان عبية أ.د/ محمد عبد العزيز
وأحيانا كمان بيحلوا أسئلة من كتاب الام سى كيو اللى هو طبعا كتاب مهم جدا جدا
_السكاشن
سكشن واحد كل أسبوع



الدروس

تقربيا حاليا ما فيش غير أستاذ عباس اللى بيدى دروس
وهو معيد ف الكلية وللأمانة هو أستاذ متميز
ولكن البايو لا تحتاج دروس فاما تحضر المحاضرات أو تسمع ل أ.د رشيد أو ممكن تذاكرها لوحدك من كتاب أ.د عماد زكى

الامتحانات

هنقولهم بالترتيب الزمنى
_امتحان الاندو كورس الاول (2.5 درجة)
5 ام سى كيو وغالبا بيجى من كتاب القسم بتاع ام سى كيو

_امتحان الترم الأول (20 درجة )
اذا الدكتورة منى استمرت يبقى برده ام سى كيو ونسبة كبيرة تجى من كتاب القسم

_امتحان الاندو كورس الثانى (2.5 درجة)
5 ام سى كيو وغالبا بيجى من كتاب القسم بتاع ام سى كيو

_البحث (5 درجات)
غالبا بيطلب ف الفترة دى وبيتسلم برده ف المعمل

_العملى (15 درجة)
بيبقى ف المعمل وسهل جدا تجيب الدرجة النهائية
وبيقى ف جزء عملى 10 درجات
وجزء نظرى ب5 درجات

بالنسبة للجزء النظرى ما تنساش تجيب ملزمة مداد تيم
بجد ملزمة رائعة هتضمن بيها الخمس درجات دول

_الاسبرنج 10 درجات وف قاعة الامتحانات
وبرده ام سى كيو

_الترم التانى (75درجة )
أهم امتحان وبيقى ف جزء نظرى وجزء ام سى كيو وكمان كيس

_ الشفوى (20 درجة )
أهم حاجة ابقى شوف أسئلة السنة اللى فاتت
واسئلة زميلك ف الايام اللى قبلك

نصيحة أخيرة : ما تشغلش بالك أوى بالفورميله وتقول أن حفظها أو مش حفظها أهم حاجة عملية التظيم بتاع التفاعل وأهمية هذا التفاعل وهى دى محور أسئلة الامتحانات واللى هتفيدك فيما بعد  

[FighteR]

بسم الله الرحمن الرحيم
السلام عليكم ورحمه الله و بركاته


هنتكلم دلوقتي ان شاء الله عن مادة

الهستولوجى



النظرى :

هندرس ان شاء الله اجهزة الجسم المختلفة
1- respiratory system
2- digestive system
3- endocrine system
4- urinary system
5- male genital system
6- female genital system
7- the eye
8- the ear
9- central nervous system




العملى :
هندرس slides عن كل system

بانسبة للمحاضرات :
نفس نظام سنة اولى محاضرتين كل اسبوع كل محاضرة ساعة واحدة ونفس الدكاترة تقريبا

بالنسبة للسكاشن :
سكشن واحد كل اسبوع

ومهم جدااااااااا حضور السكشن بانتظام لان فيه امتحانات مستمره هتخليكوا تذاكروا كتيييييير


توزيعة الدرجات :

1- 1st mid term (5) marks
2- mid year exam (20) marks
3- 2nd mid term (5) marks
4- practical exam (25) marks
5- final exam (75) marks
9- oral exam (15) marks
10- assignment & practical book (5) marks

يعنى اجمالى 150 درجة




الدروس :
1-الدكتورة جيهان
2- الدكتورة داليا المراكبى
وفيه ناس كتير بتفضل تاخد كورس للعملي لكن ممكن العملي يتحل بالانتظام في الساكشن ومراجعات الكليه كمان

[jody 92]

بسم الله الرحمن الرحيم


  ووصلنا معاكم لاخر ماده وختامها مسك ان شاء الله

هنتكلم هنا ببساطة عن مادة جديدةعليكم هتاخدوها هى


Psychology






طبعا المادة دى غريبة عليكم مش زىباقى المواد اللى اخدتوها فى سنة اولى وهتلاقوها فى سنة تانية
واى حاجة غريبة علينا بنخاف منها دايما
بس عايزة اقولكم ان المادة دىجميييلة جدا وسهلة مش عايزة منك غير الحفظ
وممكن شوية فهم وهتفيد اى دكتور مهما كان تخصصه




درجاتها كام؟


المادة ليها امتحان نظرى وحيد فى اخرالسنة

يعنى مفيش عملى ولا شفوى الحمد لله

وغالبا بتبقى اخر مادة بتمتحنها زىماهى اخر مادة بتفكر تذاكرها

عليها 50 درجة.....بس؟ شوفتواسهلة ازاى....

بس الدرجات دول بيتضلفوا علىالتراكمى بتاعنا يعنى مهمين



هناخد فيها ايه؟ايه المنهج بتاعها؟

المنهج بتقسم لتلات اقسام:

1-General

وهو اكبر جزء فيه بيتكلموا عن حاجات كتيرة ومختلفة زى الذاكرة وطرق التعلم والشخصيةوغيره

2-Ethics

وهوده الجزء اللى هايفيد اى دكتورمهما كان تخصصه

لانه بيتكلم عن اخلاق المهنة

يعنى ازاى يكون تصرف الدكتور بطريقةاخلاقية مع المريض ومع زملاؤه

3-Medical psycho

وهنا بيتكلم عن ازاى نراعى نفسيةالمريض زى ما بنراعى صحته

وده برضه جزء مفيد لاى دكتور عايزيبقى ناجح ومقبول عند الناس



الكتب او الملازم


......فيه كتابين صغيرين او ملزمتين بتوع القسم

بصراحة ومحدش يقول لحد : انا مجبتهمش اصلا

.....ملزمة د\ناجى او ملزمة د\شريف

اى واحدة منهم تذاكر منها بس لازم واحدة بس علشان محدش يتلغبط فى الحفظ



المحاضرات

بيبقى فيه محاضرتين كل اسبوع فى مدرج(ا)و(ب)

المميزات: انك لما تيجى تذاكر المادةمش هتحس انك لاول مرة بتقراها على الاقل هاتكون اخدت الفكرة

العامة بتاعتهاده غير ان المادةفيهامصطلحات كتيرة لازم تعرفها

العيوب:ان الوقت فى الكلية ضيق جدابين المحاضرات والسكاشن بتاعة المواد التانية

فقليل جدا اللى بيحضر محاضرات السايكولوجى دى طووول السنة



الدروس

فيه د\ناجى او د\شريف

ملحوظة":المادة سهلة جدا انك تذاكرها لوحدك من غير دروس ولا حتى محاضرات بس هتعتمد على التسجيلات



التسجيلات

محاضرات د\ ناجى



نظام الامتحان

50 درجة

30 درجة منهم ----------3 اسئلةwritten
هما فى الحقيقة بيبقوا 4 اسئلة بنختار منهم 3 نحلهم

بس لو فيه وقت ومش متأكد من اى سؤال يبقى الاحسن تحل الاربعة
ومتشتبش اى سؤال انت كتبته

كل سؤال ب10 درجات

والاربع اسئلة دول بيبقوا متقسمين

2-----General

1-----Ethics

1-----Medical

و20 درجة----------MCQ

والام سى كيو ده بيبقى سهل ومن الحاجات اللى انت ذاكرتها بس المهم تحل امتحانات السنين السابقة



يعنى من الاخر كدة اذاكرهاازاى:

هات ملزمة من الملازم اللى قولناعليها ولتكن ملزمة د\ناجى وهتسمع من التسجيلات المحاضرات

والكلام ده يكفى انك تبدأمذاكرةالمادة قبل اسابيع من بداية امتحانات اخر السنة

......لو كنت متأخر فى المادة ودخلت عليك ايام الامتحانات اهم حاجة تبدأ فى مذاكرتها الجزء الجينيرال

لان عليه عدد اكبر من الدرجات وبعدين تخلص الجزئين الباقيين

.....اينعم مش مهم الدروس اوالمحاضرات فى المادة دى بس مهم جدا تحضرمحاضرة رئيس القسم فيها

اللى بتبقى فى الاخر وبيحدد ايه اللى هايجى فى الامتحان وهيبقى شكل المتحان ازاى فمهمة جدا والمحاضرة دى بتبقى علامةعلى انك لازم تبدأ فى مذاكرة المادة علشان متروحش منك

بس برضه لو اتأخرت شوية متقلقش المهم تبدأ وتعمل اللى عليك
مادة السيكولوجى اغلبيتها حفظ بس فيها فهم برضه فيعنى منستهونش بيها ولا نستصعبها
واحتياطى نحاول فى ورقة الاجابة يكون فيها نظام......................
وخط كويس ممكن يكون علهم درجة




وان شاء الله كلكم تجيبوا درجات كويسة
ونقابلكم فى سنة تالتة برضه
اوعى حد يكون زهق مننا ولا حاجة


فى رعاية الله

[yojina]

كده الحمد لله اتكلمنا عن معظم جوانب سنه تانيه علي اد خبرتنا القليله فيها يعني

وشكرا لكل زمايلي علي مجهودهم

ويارب نكون قدرنا نفيدكم ان شاء الله او علي الاقل تكونوا عرفتم نبذه عن السنه قبل ماتدخلوها

واخيرا

اي  استفسار  هتلاقونا موجودين علي طووووووووووول وفي خدمتكم في اي وقت كمان

,,,,,,,

ذاكروا كويس من اول السنه واعملوا اللي عليكوا وربنا مش بيضيع تعب حد

ومفيش حاجه صعبه علي اللي بيتقي   ربنا   ويذاكر

ومتسمعوش كلام اي حد يقول ان سنه تانيه صعبه

هي مش محتاجه غير انكوا تذاكروا واعتقد المذاكره دي لعبتنا كلنا يعني

ولا ايــــــــه   ؟؟

كل سنه وانتم طيبين

بالتوفيــــــــــــق ان شاء الله

السلام عليكم ورحمه الله وبركاته